沒有那麼多或者

By 三家姐 | September 24, 2019

文字,相片:三家姐

朋友國外公幹返嚟之後,喺屋企廁所角落發現一對用過嘅眼睫毛,另外又喺浴虹去水位發現一束長長嘅頭髮。經瘋狂追問下,同居男友一時話係鐘點姐姐留低嘅眼睫毛,一時又話頭髮先係鐘點姐姐留低,眼睫毛應該係上次大班同事上去打邊爐留低嘅。然而朋友本身短頭髮,亦無配戴假眼睫毛嘅習慣。男友公司全男班,屋企幾時有請到鐘點連佢自己都講唔出。

朋友問我應唔應該相信佢,佢話覺得男朋友唔會呃自己,或者一切都係個誤會,又或者佢只係一時衝動。喜歡一個人,就會幫佢作千萬種藉口。與其話藉口係作畀對方,倒不如話係作畀自己,等自己有理由繼續落去。

或者男朋友真係臨時請咗位鐘點,鐘點姐姐又咁啱有癡假眼睫毛,然後做做下嘢覺得太重將眼睫毛除低。或者佢公司真係臨時請咗位新女同事,大家又咁快打成一片,接近四十度都上佢屋企打邊爐……或者你我都係時候要醒醒。

醒來之後,更遼闊更壯麗嘅風景等緊你。

三家姐
一名乾物女,過氣空姐,吸貓重度成癮者。 由北區嫁到北歐多年,始終放不下關於那個小漁港的一切,和米線。

  • 台北
  • 台中
  • 高雄
  • 台南
  • 清邁
  • 曼谷
  • 東京

聯絡我們

如有任何合作查詢,歡迎電郵至 hello@breakuptours.com 與我們聯絡,
如對我們有任何疑問,歡迎電郵至 cs@breakuptours.com 與我們聯絡。

iOS手機程式
2019年第4季發佈