祝他旅途愉快

By 三家姐 | August 26, 2020

文字、相片: 三家姐

朋友阿谷係一名靚女空姐,入得廚房出得廳堂,仲係我見過最會遷就人嘅女子。自幾年前佢認識咗當時男朋友之後,都冇乜點見佢開心過。唔止平時一面倒嘅遷就,對方喜歡日本文化,一句「想用全日語自駕遊日本」,行開歐美路線嘅谷姐即刻報讀日語學校、剪咗個架妹頭,仲入形入格到開始會發出日本人嘅驚嘆聲。對方輕輕講過話喜歡女仔有啲肉地,谷姐馬上怒食,自始約親朋友都係食buffet。雖然佢增肥成功,日文亦學得不錯,前男友卻突然承認有第三者而同佢分手。

分手後嘅谷谷一蹶不振,佢覺得係自己唔夠好唔夠溫柔,前男友先會移情別戀。而家佢每日每夜都會留意住前男友同現任嘅即時動態,暗中靜待佢哋分手嘅一日,希望自己可以再補上。

其實唔止谷谷,我諗每人唔多唔少都試過,以為逼自己變成對方喜歡嘅模樣先會值得被愛。以為只要埋頭埋腦地付出,對方就會被感動。結果白忙一場,對方唔領情,連自己都丟失埋。

喺任何一段關係裡面,取悅任何人之前,我哋必先要懂得取悅自己。做出任何貼心舉動之前,必先要發自內心地喜歡自己所做嘅事。委曲求全而來嘅「合拍」、種種自虐級嘅單向遷就,唔止自己辛苦,對方其實係會感受到嗰種勉強。唔係你唔夠溫柔,亦同外表無關,而係你忘記將溫柔留畀自己。

而當緣份走到盡頭嘅時候,何不乾脆利落一點。好似平時飛機到埗送客咁,一句Thank you and Goodbye,祝願對方旅途愉快,從始分道揚鑣。唔好再追究佢後來點樣,分手後同新歡過得好唔好。將一切用嚟討好佢嘅心機同時間花喺自己身上。兩個人喺一齊嘅時候已經咁委屈,分手後繼續要痛苦落去根本講唔通。既然你嘅溫柔佢不懂得珍惜,就將最後嘅溫柔留畀自己吧。

三家姐
一名乾物女,過氣空姐,吸貓重度成癮者。 由北區嫁到北歐多年,始終放不下關於那個小漁港的一切,和米線。

三家姐
三家姐
一名乾物女,過氣空姐,吸貓重度成癮者。 由北區嫁到北歐多年,始終放不下關於那個小漁港的一切,和米線。

 

 

聯絡我們

如有任何合作查詢,歡迎電郵至 hello@breakuptours.com 與我們聯絡,
如對我們有任何疑問,歡迎電郵至 cs@breakuptours.com 與我們聯絡。